с. Деревянск

 Тэ аддзин, кыдзи киссис вир

Пыдди  пуктана «Коми му» газет. Кöсъя гижыштны аслам бать Александр Андреевич Чувьюров йылысь.

Чужлöма сiйö Дереваннöйын 1923 вося апрельын. Дзолясяньыс сылы вичмылöма уджыд. Войнаöдз бать помалöма Ульянаса видз-му овмöс техникум. Фронт вылö мунлöма 18 арöсöн. Ранитчылöма, бурдöдчöма да бара веськалöма пöсь косьö. Тадз воöма Берлинöдз. Аддзылöма бурсö и лёксö. Висьтавны вöлi кутас да, синваыс доршасьö. Медъёна пö жальöсь ёртъясöй, кодъяскöд öтлаын воюйтiм танкöвöй часьтын. Унаöн пуктiсны юрсö Чужан му вöсна. Эз и тöдлыны лючки-бур олöмсö. Бать пыр вöлi шуö, мед пö эськö тi некор эн тöдлöй войнатö. Мед пыр вöлiнныд шудаöсь…

А Победа луныд вöлi сылöн медрадейтана праздникöн. Ме öнi жалита, мый эг зэв юасьлыв батьлысь война йывсьыс. Ас бöрас сiйö колис некымын орден да медаль. Ачыс тай шулiс, медальяснас пö чача пыдди дзолядырйиныд ворслiнныд. А челядьыс бать-мамлöн вöлi уна. Кöкъямыс ныла-пиаöс быдтiсны, сувтöдiсны кок йылас. Ставнымöс велöдiсны и. Öнi внук-внучкаяс эмöсь, правнукъяс и.

1951 воын бать помалöма Тимирязевса академияын курсъяс. Уджалöма Кулöмдiнса МТС-ын главнöй агрономöн. Ветлöма район пасьта. Кытi подöн, кытi пыжöн, кытi вöлöн. Уджалöма и Вочын, Керчомъяын, Ручын, Дзолльын, Канаваын.

Олöмаöсь бать-мам сьöкыда, тшыгъялöмаöсь, но нэмсö зiльöмаöсь став вынсьыс. Бать шулывлöма: муыд пö ловъя, бура кö дöзьöритан, уна и босьтан. И быдмöгъястö бура тöдiс. Видз вылысь быд дзоридз да турун йылысь уна и  висьтавлiс миянлы.

1958 воын бать вуджöма Дереваннöй лесопунктö да сэсянь нин петiс пенсия вылö. Мöрччöма войнаыд и сьöкыд уджыд да, эз дыр ов, важöн нин мунiс миян дорысь. Мам ловъя на, но дзоньвидзалуныс омöлик. Кыдзкö тай олö на висигтырйи. Шуö и мамным, мед пö тi эн тöдлöй войнасö. Сiйö вайö шог да синва… А öнi со и Чечняын на ыпъялö. Оз позь лэдзны паськавны тайö биыслы.

Менам неважöн чужис татшöм кывбур:

Пöдтö сьöлöмтö помасьтöм дой,

Гортсянь ылынöсь дона пиян.

Уна кольöма узьтöм вой.

Бöрдö-сыркъялö Чужан му миян.

Уси йöз муö уна том морт,

Кусi зонъяслöн шуда олöм.

А öд быдöнлöн эм аслас горт,

Потö шогысла мамъяслöн сьöлöм.

Колö дугöдны вир кисьтана кось.

Помтöг том йöзлöн олöм мед пуас.

Мед шоглуныс некор оз босьт,

Быдöн шуда век ас чужан муас!

А со сэсся гижи батьлы сиöм кывбур:

Тэ томöн война вылö мунiн,

Тэ дорйин ассьыд чужан му.

Тэ асьтö шудаöн век шуин,

Мый сьöкыд, некор дзик эн шу.

Тэ аддзин, кыдзи киссис вир,

Кыдз ёртъяс усины йöзiнö.

Кыдз пансис виччысяна мир,

Кор пырин вермысьöн Берлинö.

Меным батьö важöн шулiс,

Война некор мед оз ло.

Колö лöньлун Чужан мулы,

Шог мед сьöлöмöдз оз во.

Батьö менам важöн абу ловъя,

Шойна ягын куйлö вель нин дыр.

Оз нин сотны ранаяслöн дойяс,

Надзöникöн гортö оз нин пыр.

Внукъяс öнi челядьыслöн киын,

Паськалö да сöвмö ыджыд рöд.

Арлыдöн кöть суам нывъяс, пиян,

Тэ век миянкöд, бур батьö, тайöс тöд!

 

Мария Игушева.

Дереваннöй сикт,

Кулöмдiн р.

Коми му, 2005, Февраль 12 лун.

 © Усть-Куломская межпоселенческая библиотека